Në kuadër të veprimeve të thelluara hetimore, bazuar në inteligjencën informative, për zbardhjen e vrasjes së ndodhur më 13 janar 2025, janë identifikuar, lokalizuar dhe ndaluar autorët e dyshuar.
Shtetasi Erald Cenaj, 36 vjeç, banues në Kukës, është ndaluar si person i dyshuar për sigurimin e automjetit të përdorur në vrasjen e shtetasit Kristian Marku, alias Kristian Bardhi.
Hetimet intensive, të realizuara nga specialistët e Sektorit për Hetimin e Krimeve të Rënda në DVP Vlorë, kanë dokumentuar se automjeti që është përdorur për ngjarjen është siguruar nga shtetasi Cenaj. Po ashtu, gjatë periudhës hetimore janë sekuestruar prova që ndihmojnë në zbardhjen e ngjarjes.
Veprimet hetimore vijojnë në bashkëpunim të ngushtë me Departamentin e Policisë Kriminale dhe Prokurorinë e Juridiksionit të Përgjithshëm Vlorë, për zbardhjen e plotë të ngjarjes dhe kapjen e autorëve të mundshëm.
