Mjaftuan vetëm pak minuta pasi ndodhi ngjarja e kobshme ku burri vrau ish-bashkëshorten, që shoqëria shqiptare të ulëriste përmes komenteve në rrjetet sociale.
Pritej që ky marshim i njoftuar më herët edhe përmes portaleve, të ishte një protestë më e madhe për një sistem të munguar drejtësie, ku jeta ka pak vlerë. Por pranë Ministrisë së Drejtësisë nuk ishin më shumë se 50 persona.
Me pankarta në duar, e me tullumbace të zinj, në kujtim të të gjitha viktimave të këtij viti, protestuesit kërkuan më shumë vëmendje nga shteti, e një drejtësi të re.
Në nderim të femrave viktima, të pranishmit ndezën edhe disa qirinj.
Marshimi vijoi drejt parlamentit, por para kësaj protestuesit zgjodhën të hidhnin bojë të kuqe në muret e Ministrisë së Drejtësisë, si simbol të gjakut të dredhur gjithë këto kohë nga dhuna.
