Vodhi automjetin, përfundon në pranga 19-vjeçari në Elbasan
Një 19-vjeçar është arrestuar këtë të diel nga policia e Elbasanit. I riu dyshohet se vodhi një automjet gjatë natës.
19-vjeçari rezultonte me precedentë të mëparshëm penal për të njëjtat vepra penale.
Sipas njoftimit zyrtar, është sekuestruar automjeti i vjedhur.
“Si rezultat i veprimeve të shpejta hetimore dhe operacionale të kryera menjëherë pas kallëzimit të shtetasit Sh. K., 60 vjeç, se gjatë natës, në lagjen “28 Nëntori”, i kishin vjedhur automjetin, specialistët për Hetimin e Krimeve të Komisariatit të Policisë Elbasan kanë organizuar dhe finalizuar operacionin policor të koduar “Reagimi”.
Në kuadër të këtij operacioni u bë i mundur identifikimi, kapja dhe arrestimi në flagrancë i autorit të dyshuar, shtetasit E. B., 19 vjeç, banues në Elbasan, i cili u kap nga shërbimet e Policisë teksa qarkullonte me automjetin e vjedhur, pa leje drejtimi.
Automjeti i vjedhur u sekuestrua në cilësinë e provës materiale.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprat penale “Vjedhja” dhe “Drejtimi i automjeteve në mënyrë të parregullt”, thuhet në njoftim.
/vizionplus.tv
