Qyteti i Vlorës vijon të përballet me mungesën e ujit të pijshëm për të katërtën ditë radhazi. Kur kanë kaluar mbi 92 orë pa furnizim me ujë në pjesën më të madhe të qytetit, banorët janë detyruar sërish në orët e para të mëngjesit të drejtohen drejt burimeve alternative të ujit.
Qytetarë të shumtë janë parë pranë burimit nëntokësor afër tunelit të Ujit të Ftohtë, si edhe pranë një depoje të ujësjellësit në të njëjtën zonë, duke u përpjekur të sigurojnë ujë për nevojat bazë familjare.
Banorët shprehen të indinjuar për situatën e krijuar dhe fajësojnë Bashkinë e Vlorës për mungesën e zgjidhjeve konkrete. Sipas tyre, çdo ditë janë të detyruar të kërkojnë ujë ku të munden, ndërsa situata bëhet edhe më e vështirë për shkak të afrimit të festave të Vitit të Ri.
Në zonën e Ujit të Ftohtë janë parë gjithashtu edhe emigrantë vlonjatë të kthyer në atdhe për festat, të cilët përballen me të njëjtin problem, duke e cilësuar gjendjen të papranueshme për një qytet turistik si Vlora.
“Ky avaz është në Vlorë. Në një moment kur qyteti është pa ujë, të gjithë shkojnë në festë. Kjo është një papërgjegjshmëri e madhe”, thotë një qytetar.
“Jetoj në Itali, erdha për vitin e ri, katastrofë është”, thotë një emigrant.
Ndërkohë, një ditë më parë, të irrituar nga mungesa e ujit të pijshëm, disa qytetarë kanë hyrë me forcë në ambientet e Teatrit “Petro Marko”, aty ku po zhvillohej mbrëmja gala, festa e fundvitit për qytetarët e Vlorës.
Autoritetet kanë deklaruar se defekti, i cili ka ndodhur katër ditë më parë, pritet të riparohet gjatë ditës së sotme. Megjithatë, qytetarët vijojnë të jenë të indinjuar dhe të grumbullohen në zonën e Ujit të Ftohtë për të siguruar ujë të pijshëm.
