Heqja e fotografisë së Hashim Thaçit nga Vjosa Osmani pasi mori postin e kryeparlamentares është bërë shkak që PDK të bojkotojë mbledhjen në Kryesinë e Kuvendit. Përfaqësuesit e Partisë Demokratike të Kosovës pretendojnë se Osmani duhet të rikthejë në vendin e vet foton e presidentit Thaçi.
Kreu i Grupit Parlamentar të PDK-së, Bedri Hamza tha se inspirim duhet të gjendet në hapsira private dhe se veprimi i Osmanit është antikushtetuese, ndërsa shtoi se institucionet zyrtare janë të rregulluara me ligj.
Mungesa e fotos së Thaçi u konstatua pak ditë më parë gjatë vizitës së ambasadorit të SHBA-ve në Prishtinë, Philip Kosnett.
Osmani theksoi të martën në “Facebook” se gjatë gjithë angazhimit të saj politik ka pasur si referencë vetëm ish-presidentin Ibrahim Rugova.
