Pas tre muajsh trajtim në një nga spitalet në Itali, dy të mbijetuarit e tërmetit të 26 nëntorit janë kthyer këtë të hënë në Shqipëri.
Albert Cara dhe Marlin Shkodra u pritën në aeroportin e Rinasit nga ministrja e Shëndetësisë, Ogerta Manastirliu dhe te afërmit e tyre.
Të mbijetuarit falenderuan qeverinë dhe mjekët italianë për kujdesin e treguar ndaj tyre.
“Nuk më besohet që jeni në gjendje kaq të mirë. Shumë faleminderit miqve tanë italianë për ndihmën e pakursyer”, u shpreh ministrja Manastirliu.
“Kemi rilindur. Me dy fjalë ky ka rilindur 30-vjeç, unë 59-vjeç nga e para. Kemi rilindur edhe njëherë për të filluar jetën e re. Dikush më tha atje në pavion, një doktoreshë e diçka e tillë. Jo infermiere, ishte sanitare, e njoh si fytyrë….’Albert’ më tha, se i pata bërë gati me folur shqip gjysmën e pavionit, më tha ‘Albert, jeni shumë të fortë, ku e gjeni atë force ju shqiptarët edhe ne njerëz jemi, më tha, të gjithë atë hall që keni pasur ju dhe Marlini, ku e gjeni atë forcë që ta përballoni”, tha Albert Cara, i mbijetuari i vetëm i familjes Cara.
Nga tërmeti i 26 nëntorit, 59-vjeçari humbi gruan, dy djemtë, vajzën, të fejuarën e djalit, nusen e xhaxhait dhe mbesën në Thumanë
