Partia Demokratike, përmes zëdhënëses Ina Zhupa ka sjellë kësaj radhe rrëfimin e Valbona Ramës, banore në njësinë numër 4 në kryeqytet, banesa e të cilës u dëmtua nga tërmeti i 21 shtatorit.
Valbona shprehet se ende nuk e di se çfarë do të bëhet me shtëpinë e saj, pavarësisht vlerësimit nga ana e ekspertëve si të pabanueshme.
Po ashtu, thekson se në në shtëpi po qëndrojnë me frikë, duke qenë se nuk kanë ku të shkojnë, pasi shteti nuk iu ka dhënë as bonus qiraje.
“Jam Valbona Rama. Jam ankuar për shtëpi te Bashkia, kanë ardhur nja dy-tre herë ato edhe e kanë parë, kanë thënë që do ta rregullojmë, më thanë që do të japim dhe bonus, nuk më kanë dhënë as ndihma, asnjë gjë s’po bëhet”, denoncoi Valbona.
Pjesë nga biseda:
Ina Zhupa: Ju kanë ardhur ekspertë?
Valbona Rama: Kanë ardhur, ata të Bashkisë kanë ardhur.
Ina Zhupa: Kur erdhën, çfarë ju thanë? Është e banueshme?
Valbona Rama: Është e pabanueshme tha shtëpia, nuk banohet këtu tha, do t’ju ndihmojmë edhe juve tha dhe asnjë gjë s’po na japin. Të paktën të vijnë ta rregullojnë vetë. Nuk dua as lekë, asnjë gjë se këtu nuk jetohet. Po të kisha unë para, unë e rregulloja vetë, nuk prisja ata të vinin, po unë kam hall se do fillojnë shirat tashi, se erdhi dimri edhe do pikojë gjithë shtëpia edhe ku do rri me gjithë kalamajtë, nuk e di.
Ina Zhupa: Ju jetoni këtu?
Valbona Rama: Këtu, ja te kjo shtëpia e kalbur që është nga tërmeti. Kam një vit. Që në shtator është bërë kjo punë. Dokumentat i kam. I kanë bërë me fotografi e me të gjitha dhe kur vjen puna asnjë gjë s’po bëjnë. Unë dua që nga Bashkia, qeveria të më vijë të më rregullojë shtëpinë. Asnjë gjë tjetër nuk dua, se po jetoj si mos më keq!
