Vështirësi nga dëbora dhe ngricat, situatë problematike në zonat malore në veri dhe juglindje të vendit
Reshjet e dëborës vijojnë me intensitet të shtuar në veri dhe juglidnje të vendit.
Në Dibër temperaturat nën zero kanë shkaktuar probleme kryesisht në qarkullim. Rruga rurale Peshkopi-Lurë është e pa qarkullueshme nga bora, dhe lëvizja bëhet nga Rrësheni.
Ndërkohë janë akoma të bllokuara disa rrugë të brendëshme fshatrash me qendrën Administrative Silisht, Lurë, Kala e Dodës, Zall Dardh e Tomin.
Në Bulqizë gjithashtu vijon të mbetet e bllokuar rruga mes qytetit të Vjetër e qytetit te Ri , ndërsa janë të bllokuara rrugët e fshatrave me qendrat Administrative në njësitë Trebisht, Ostren, Martanesh.
Akset e rrugëve nacionale janë të kalueshme, përveç segmentit Ura e Çerenecit-Steblev qe është thuajse i pakalueshem pasi nuk është ndërhyrë për ta pastruar.
Ndërkohë në akset e rrugës së Arbërit, Qafë Bualli-Krastë dhe Peshkopi-Vasie nga mjete lëvizja bëhet me goma dimërore.
Në Shkodër të gjitha akset rrugore janë të kalueshme, por drejtuesit e mjeteve duhet të jenë të pajisur me goma dimërore dhe zinxhir. Në Bogë – Qafe Thore – Theth, firmat kontraktore kanë ndërhyrë për pastrimin e këtij aksi, pasi në zona të caktuara trashësia e borës arrinte në 1.5 metra.
Paralelisht është kryer kriposja e saj pasi nga temperaturat e ulëta ka patur ngrica në rrugë.
Edhe në Tamarë – Vermosh është kryer pastrimi dhe kriposja, pasi ngricat kanë vështirësuar qarkullimin në orët e para të mëngjesit.
Reshjet e dëborës dhe kushtet e paqëndrueshme atmosferike kanë sjellë problematika në disa zona të qarkut Korçë, kryesisht në formën e rrëshqitjeve të dherave dhe bllokimeve të rrugëve.
Në bashkinë Pogradec, problematika kryesore mbeten rrëshqitjet e dherave. Gjatë ditës së djeshme, inxhinierët e Shërbimit Gjeologjik kanë inspektuar zonat problematike.
Aksi Ersekë–Leskovik është i hapur dhe i kriposur.
Edhe në Elbasan temperaturat kanë zbritur në -10 grade celcius në zonat malore, si pasojë në aksin nacional Elbasan-Qafë Thanë ka pasur reshje debore dhe por punohet vazhdimisht për të shmangur bllokimin e rrugës.
