I gjithë zinxhiri komandues në Komisariatin e Peqinit është pezulluar nga detyra në lidhje me skandalin e zbuluar më herët për laboratorin e kanabisit që u gjet në fshatin Kurtaj.
Sipas policisë, 7 punonjës të uniformave blu përfshirë shefin e komisariatit, drejtues të sektorit të krimeve, u pezulluan nga detyra pasi dyshohet si përgjegjës për lejimin e kultivimit të lëndëve narkotike të zbuluara në magazinën e drogës.
Me urdhër të kreut të Policisë së Shtetit Skender Hita, u pezullua nga detyra shefi i komisariatit të Peqinit, Altin Gusho, shefi i krimeve Danjel Kacaniku, specialist i policisë kriminale, Sefer Dushku dhe ai i Policimit në Komunitet, Muharrem Zylyfi.
Valës së pezullimeve nuk i kanë shpëtuar as ish-shefi i Komisariatit të Peqinit, Bilbil Lita, i cili aktualisht është krye të policisë së Devollit.
Gjithashtu dhe ish-shefi i krimeve Denis Sinani është pezulluar nga detyra, i cili kohët e fundit u trasferua në Devoll. Arben Koseni është një tjetër efektiv gjithashtu i pezulluar nga detyra.
Masat u bënë prezente nga vetë Drejtori i Përgjithshëm i Policisë, Skënder Hita në një mbledhje të zhvilluar me gjithë drejtorët vendorë dhe ata të Kufirit.
Hita u ka kërkuar të gjithë drejtorëve masa të menjëhershme për të luftuar kultivimin e kanabisit, si dhe mostolerim për asnjë punonjës që nuk përmbush detyrën.
Banesa ku u gjet kanabisi i përket Bilal Hasës, i cili ishte Drejtor i Burgut të Rrogozhinës, i pezulluar nga detyra menjëherë pas skandalit.
Hasa u shpall në kërkim dhe u paraqit vetë pas disa orësh në komisariat, por u la i lirë pasi sipas bluve nuk kanë prova për implikimin e tij.
Hasa bëri përgjegjës vëllain e tij duke thënë se ishte ai që kujdesej për këtë banesë.
Të përfshirë në këtë skemë ishin dhe disa punonjës të OSHEE të cilët kishin mundësuar një trasformator për furnizimin me energji elektrike për laboratorin e drogës.
