Kryebashkiaku Erion Veliaj ka nisur dëgjesat me qytetarët e Bashkisë së Tiranës për Buxhetin 2019 dhe për bilancin e punës së realizuar në këto 3 vjet. Veliaj ka vendosur të nisë dëgjesat nga Pazari i Ri, zonë të cilën kryebashkiaku e konsideron si simbol të transformimit që ka pësuar kryeqyteti.
Sipas njoftimit të zyrës së shtypit bashkisë, kryebashkiaku Veliaj theksoi para banorëve se vetëm në Njësinë 8 është investuar më shumë nga sa ishte premtuar në 2015.
“Nuk premtuam tram, por ato që premtuam i bëmë. Siç e patë, ju keni nxjerrë nga njësia edhe kryetar Bashkie, edhe nën/kryetare Bashkie që premtuan tramin, premtuan se do investoheshin 1.1 miliardë në këtë njësi, por investuan më pak se 1/5 e asaj që premtuan. Ne thamë do investojmë 960 milionë, kemi investuar 970 milionë. Është më mirë t’i qëndrosh fjalës tënde, se sa të premtosh majat dhe ndërkohë mos të bësh as 1/5. Kjo është arsyeja pse ndihem shumë mirë sepse kemi bërë një plan si familje nikoqire. Edhe pse i kemi taksat e kryeqytetit më të ulëtat se çdo kryeqytet në rajon, kemi arritur në tre vjet të bëjmë më shumë investime dhe më shumë progres se çdo kryeqytet tjetër i rajonit tonë”
Ndërsa përmblodhi investimet e kryera në njësinë nr 8 në Tiranë si edhe përmendi planet e së ardhmes për këtë zonë, Veliaj nuk la jashtë vëmendjes edhe vendimin e qeverisë për mbylljen e basteve sportive nga 1 janari i vitit të ardhshëm.
“Nuk besoj se ka një nismë më të mirë të qeverisë shqiptare se iniciativa për të mbyllur të gjitha pikat e basteve e kazinove. Ej, jemi tek njësia 8, e keni parë ku e ka bustin Vojo Kushi? Është i mbytur me pikat e basteve, nuk e gjen dot Vojo Kushin tek Selvia. Pikat e basteve, duke nisur nga Vojo Kushi i pari, që lirohet në datën 1 janar, duhet të largohen nga Tirana. E dini se fondi që shkon për baste është më i madh se buxheti i Bashkisë së Tiranës në një vit? Pra, në qoftë se në Tiranë mbyllen kazinotë e bastet, do të kemi kursyer ekzaktësisht, ndoshta edhe diçka më shumë se sa është buxheti i Bashkisë, pra kemi dyfishuar financat lokale, vetëm duke mbyllur industrinë e veseve. Ky është një lajm i mirë për Tiranën, që duhet t’i gëzohemi të gjithë”
Veliaj nënvizoi gjithashtu se për të patur një buxhet sa më të drejtë dhe më realist, duhet që çdo qytetar që nuk është regjistruar ta bëjë atë pranë njësive administrative.
