Ditën e fundit të fushatës elektorale, kryebashkiaku i Tiranës, Erion Veliaj e nisi në emisionin “7 pa 5” në “Vizion Plus”.
Përballë gazetarit Thimi Samarxhiu, Veliaj deklaroi se presidenti Ilir Meta dhe ish-kryeministri Sali Berisha qëndrojnë të fshehur pas kryedemokratit Lulzim Basha.
Duke theksuar se ata kanë probleme me drejtësinë, kreu i Bashkisë së Tiranës paralajmëroi gjykimin për ta pas 25 prillit.
“Ata që i promovojnë paramilitarët, që i çonin nga veriu për të shkuar në jug, ata që jepnin urdhra për të bombarduar Vlorën, janë po ata. Ilir Meta dhe Sali Berisha kanë probleme të rënda me drejtësinë. 25 prilli është gjykimi i tyre politik, më pas do të nisin gjykime të tjera. Shqiptarët e dinë këtë, ne e dimë këtë. Luli aq e kishte takatin ta mbante atë fytyrën e një dali perëndimor, thelbi i tij komandohet nga Meta dhe Berisha, me të njëjtin stil siç kanë mbajtur peng shqiptarët për 30 vjet. Ngjarja në Elbasan tregoi se zgjedhjet janë shumë të rëndësishme sepse janë dy botë: ose paramilitarët, na tërheqin zvarrë për tek e kaluara apo shumica e shqiptarëve që duan ta kontrollojmë vetë jetën dhe jo paramilitarët.”
