Ish-Sekretari i Përgjithshëm i PD, Arben Ristani i ka cilësuar si vegla të Ramës drejtuesit e PD zyrtare. Në fjalën e tij në emisionin QuoVadis në Vizion Plus, Ristani theksoi se dalja me kandidatë për shkak të vulës së PD do të shkaktojë dëm, por nuk do të pengojnë grupimin e “Foltores” që të arrijë rezultatin e kërkuar.
“Procesi nga ku dolën kandidatët tanë është një proces që i afrohet më të mirës për shkak të Primareve. Në këto kushte unë besoj që PD do garojë me dinjitet dhe do fitojë maksimalisht bashkitë e vendit. Përsa i përket veglave që pushteti i përdor për ta penguar ku hynë edhe rasti i Alibeajt me shokë, unë them se dëm do të bëjnë, por jo aq sa të na pengojnë në ato rezultate që duam të arrijmë”, tha ai.
Në të njëjtën kohë, Ristani deklaroi se PD vjen pas një sulmi të madh, ku u përdor dhe vetë drejtësia për ta penguar që të garonte në zgjedhjet elektorale të 14 majit.
“Partia Demokratike vjen pas një sulmi shumë të madh dhe të pa princip ndaj saj. Sulmi i cili vuri në pikëpyetje dhe institucionet demokratike të vendit, ku u përdorën deri edhe gjykatat e u kompromentuan rëndë edhe gjykatat vetëm që PD të pengohej që të futej në zgjedhje. Megjithatë, besoj që pushteti ia arrit planit minimal që të merrte siglën e PD. Nga ana tjetër, brenda për brenda PD zhvilloi një proces shumë të mirë parapërgator për këto zgjedhje, këtu kam parasysh procesin e Primareve, i cili është risi në përgjithësi në mënyrën e të bërit politik. Ne vendosëm që thelbin e demokracisë apo mënyra se si organizohet partia brenda për brenda të ishte plotësisht demokratike dhe në këtë prices Primaresh zgjodhëm dhe kandidatët. Besoj se kemi zgjedhur kandidatët më të mirë të mundshëm”, tha ai.
