Nënkryetari i LSI, Petrit Vasili akuzoi kryeministrin Edi Rama se po tallet me hallet e qytetarëve. Nëpërmjet një postimi në “Facebook”, Vasili tha se ai po bën vetëm propagandë dhe po ju thotë qartë qytetarëve se po tallet me ta.
“Edi me telefon përballë Edit pa qeveri! Edi me telefon në dorë bën sikur zgjidh ndonjë hall, merr ndonjë urim hallexhinjsh, të cilëve jua tall keqas iluzionet për zgjidhje dhe më së fundi nënqesh me kënaqësi e thotë: jua hodha, jua prisha mendjen, jam i zoti për propagande, jam ujk i mashtrimit, jam mjeshtër për të hedhur hi syve, jam jam jam……! Është, është, është gjithçka është. Por kryeministër nuk është. Me telefon Edi jua thotë vetë të gjithëve, që s’ka qeveri, s’ka zyra që funksionojnë, s’ka strukture shteti serioz. Ka, ka, ka vetëm një zero shtet, që i ngjan plehut sipër të cilit kakaris me tefon në dorë Edi vetë. Edi po tregohet rob zoti me shqiptarët dhe nuk po i gënjen fare. Po jua thotë copë që s’ka qeveri dhe maksimumi, që mund të kapin është nja 30 sekonda muhabet me Edin.”
Me ironi, Petrit Vasili deklaroi se Edi Rama po tregohet shumë i sinqertë në çdo dalje të tijën dhe po thotë se sa të jetë ai në krye, nuk do të ketë shtet.
“Ndizni qiri që të mos jetë Edi me ndonjë sekëlldi, ndonjë kollë, marrje fryme apo diarre e të vjella se edhe këtë gallatën me telefon e humbet dhe s’e kapni dot më as këtë. Ndaj askush të mos qahet për mungesë sinqeriteti nga Edi. Ai e bëri të vetën. Jua tha copë: që sa të jem unë harrojeni shtetin, bëjini dua estradës me telefon, mbani njëri tjetrin dhe bëjini derman kokës.”
