Monika Kryemadhi ka reaguar me tone të ashpra ndaj kryeministrit Edi Rama pas deklaratave të këtij të fundit mbi listat e LSI-së për zgjedhjet e parlamentare.
Gjatë fjalës së saj, Kryemadhi shprehet se Rama nuk është gjë tjetër veçse një humbës që e ka shkruar fundin e tij më 25 prill. Ajo shtoi se kreu i qeverisë kishte marrë sot zanatin e belly dancer-it.
“Tashmë do t’i përgjigjem Edi Ramës. Edi Rama që sot shfrynte e turfullonte dhe shkumëzonte nga inati. Nga inati sepse përfaqësonte një listë humbëse dhe kishte përballë listën fituese. Kishte përballë listën fituese, listën e opozitës. Atë listë të cilën prej më shumë se 2 vitesh tentoi ta blinte, e kërcënoi, e shantazhoi, por nuk e mundi dot. Sot shikonim Edi Ramën që si balerin vallëzonte i vetëm në bunkerin e tij dhe kishte marrë zanatin e belly dancer-it. Por e garantoj dhe e siguroj që më 25 prill, as qafën nuk ka për të lëvizur dot, e jo më belin. Për belidencin që vallëzonte sot si një çingije e beu të Lushnjes në fillimin ‘Koncert në vitin 1936’, nuk më ngelet gjë tjetër që ti them: data jote e skadencës është 25 prilli, rruga jote deri në 25 prill është shumë e thjeshtë, duke pasur të gjitha tv rreth teje, policinë, prokurorinë, SPAK, OFL, çdo gjë, por vetëm një gjë nuk ke me vete. Nuk ke me vete popullin shqiptar, nuk me vete, të rinjtë, të rejat, gratë, burrat, pensionistët, nuk i ke Edi Rama sepse i ke gënjyer, mashtruar. Ke 8 vite që i gënjen, në 8 vjet mbi 600 mijë pensionistë nuk ua ke rritur asnjë lek pensionin, përkundrazi u janë shtuar faturat e ilaçeve që janë më të shtrenjta se asnjëherë. Ke mashtruar rininë shqiptare, ku ju the do të hapim 300 mijë vende pune, përkundrazi i ngrite me plaçka në krah dhe i degdise në emigracion.”
Sipas saj, Rama mashtroi për shëndetësinë falas, duke e kthyer në më të shtrenjtën në Evropë.
“Mashtrove këdo Edi Rama, mashtrove dhe familjen tënde duke thënë se jam burrë i mirë, por ti nuk je gjë tjetër, je vetëm një burrë, i cili nuk ka më kthim mbrapa dhe do të ngelesh një humbës, një humbës i cili në memorien e shqiptarëve do të mbahesh mend, si njeriu që shkatërroi ata, sekterisi shqiptarët. Por do të mbahesh mend edhe si njeriu që shqiptarët e tërhoqën zvarrë pas 25 prillit. Me votë Edi Rama, se për gjërat e tjera s’ta bëjmë dot nderin që ti japim fund të menjëhershëm tmerrit që të pret.”
