Një valë e fortë të nxehti po përfshin një pjesë të madhe të Evropës Perëndimore, nga Britania e Madhe deri në Itali dhe Spanjë, duke sjellë temperatura rekord për muajin maj dhe pasoja të rënda në disa vende.
Në Francë, autoritetet raportuan se të paktën shtatë persona kanë humbur jetën, përfshirë disa raste mbytjesh, që dyshohet se lidhen drejtpërdrejt me kushtet ekstreme të të nxehtit. Njëkohësisht, shërbimi meteorologjik francez “Météo-France” konfirmoi se dita e djeshme ishte më e nxehta e regjistruar ndonjëherë në muajin maj në vend.
Edhe në Britaninë e Madhe u thyen rekorde historike, ku temperaturat arritën deri në 34.8°C në Kew Gardens, në Londër, duke tejkaluar rekordin e mëparshëm të vitit 1944. Autoritetet paralajmëruan se këto temperatura janë të pazakonta edhe për verën dhe pritet që vala e të nxehtit të vijojë edhe për disa ditë.
Në Itali, veçanërisht në rajonin e Lacios që përfshin edhe Romën, janë vendosur kufizime për punën në ambiente të jashtme gjatë orëve më të nxehta të ditës, nga ora 12:30 deri në 16:00, masë që synon mbrojtjen e punëtorëve nga ekspozimi i rrezikshëm ndaj diellit.
Ndërkohë, edhe Spanja dhe Irlanda po përballen me temperatura shumë mbi normalen, me paralajmërime për net tropikale dhe nxehtësi që pritet të arrijë kulmin në ditët në vijim. Meteorologët e lidhin këtë fenomen me një masë ajri të nxehtë nga Afrika e Veriut dhe me ndikimin e një sistemi të fuqishëm anticiklonik.
Ekspertët paralajmërojnë se ndryshimet klimatike po i bëjnë valët e të nxehtit më të shpeshta dhe më intensive në Evropë, duke rritur rrezikun për shëndetin publik dhe duke shkaktuar pasoja gjithnjë e më të rënda në jetën e përditshme.
Edhe në Shqipëri, termometri sot shënon vlera të larta, ku në Tiranë, Durrës, Berat, Elbasan dhe Fier termometri pritet të arrijë deri në 35°C. Ndërsa në Shkodër dhe Lezhë temperaturat maksimale do të jenë rreth 34°C.
/vizionplus.tv
