Kryeministri Edi Rama ka folur sërish sot për vaksinimin e personaliteteve të moshuar. Nga Elbasani, shefi i qeverisë tha se bëhet fjalë për disa personalitete në të 80-tat, të cilët nisin të parët këtë të diel procesin e vaksinimit, për të vijuar më pas me njerëz të zakonshëm.
Teksa i konsideroi akuzat e opozitës, të padenja, ai theksoi se bëhet fjalë për personalitete që i kanë dhënë vlera shoqërisë sonë.
“Fillon me ta në mënyrë simbolike, në mënyrë shembullore, për të vijuar me tjerët. Por edhe këtë rast e përdorën për të shfryrë mllefin ndaj qeverisë dhe ndaj meje. Janë njerëz që i kanë dhënë kësaj shoqërie, kanë kontribuar dhe sakrifikuar për të krijuar vlera në këtë shoqëri, ndaj nuk besoj se do të ishte e denjë të ngrihej gjithë kjo stuhi në gotë, kur bëhet fjalë në fakt për dhjetëra persona, që në peshën e vaksinave që do të bëhen, janë disa pika ujë në det”, tha Rama.
