Të gjithë civilët që punojnë për Departamentin e Mbrojtjes duhet të vaksinohen plotësisht për Covid-19 deri më 22 nëntor, sipas udhëzimeve të reja të publikuara këtë të hënë nga zyra e Pentagonit. Një memorandum i nënshkruar nga Zëvendës Sekretarja e Mbrojtjes, Kathleen Hicks, shpjegon se mandati i ri është në përputhje me direktivën presidenciale të lëshuar muajin e kaluar që kërkon nga agjencitë federale të zbatojnë urdhrat për vaksinën.
Pentagoni, kërkoi në fillim të këtij viti që të gjithë anëtarët e ushtrisë të merrnin vaksinat duke përcaktuar edhe datat për secilën nga dozat.
Secili prej shërbimeve ushtarake lëshoi afatet e veta për personelin e tyre për të marrë vaksinat. Ushtarët me detyrë aktive të ushtrisë duhet të vaksinohen plotësisht deri më 15 dhjetor kurse Rezerva e Ushtrisë dhe Garda Kombëtare deri më 30 qershor 2022.
Në Memorandum përfshihen edhe punonjësit e Marinës, anëtarët e Forcave Ajrore dhe Hapësinore, sëbashku me personelin e Gardës amerikane.
Ndërkohë, menjëherë pas shpalljes së këtij vendimi, dy anëtarë të shërbimit ngritën një padi kundër Sekretarit të Mbrojtjes Lloyd Austin në përpjekje për të kundërshtuar vaksinimin e detyruar, duke kërkuar gjithashtu një përjashtim për ata të cilët e kanë kaluar Covid-19.
Paditësit argumentojnë se urdhri i vaksinës i Departamentit të Mbrojtjes “është në shkelje të hapur” të të drejtave të anëtarëve të shërbimit dhe është antikushtetues.
