Ditët e fundit është vënë re një tendencë në rënie e shifrave të koronavirusit në vendin tonë dhe këtë kryetarja e Komitetit Teknik të Ekspertëve, Mira Rakacolli, ja atribuon masave të marra.
Në një intervistë për edicionin qendror të lajmeve në “Vizion Plus”, Rakacolli deklaroi se edhe qytetarët janë ndërgjegjësuar më shumë në zbatimin e masave. Ajo bëri një koment të shkurtër edhe për fushatën elektorale të PD.
“Tendenca e rënies së shifrave u vu re qysh me propozimin e masave nga Komiteti Teknik për të ulur orën policore. Edhe sensibilizimi më i madh i njerëzve karshi sëmundjes dhe masave. Mendojmë që ndryshimi vjen si rezultat i masave të marra dhe ndërgjegjësim i popullsisë. Ajo që pamë në hapjen e fushatës zgjedhore mund të na çojë në rritje të infektimeve.”
Me bindjen se deri në fillim të qershorit do të jetë vaksinuar gjysmë milioni e popullatës, Mira Rakacolli dha edhe garancinë se vaksinat që kanë ardhur në Shqipëri janë të sigurta.
“Të qenurit skeptik për vaksinat është diçka normale, sidomos në kohën kur janë të pakta informacionet dhe ka disa alternativa. Për të gjitha këto vaksina, aprovimin për të hyrë dhe për t’u përdorur në Shqipëri, e ka dhënë Komiteti i Ekspertëve për Vaksinat. Përveç rekomandimit të tyre, kalon në disa komisione të tjera, ku verifikohet origjina e vaksinës. Janë edhe studimet dhe mekanizmi i vaksinave. Vaksina kineze ka virus të inaktivizuar. Janë vaksina të provuara në shumë vende dhe studimet janë shumë serioze për të katër vaksinat.”
