Franca vijon akuzat ndaj Shteteve të Bashkuara të Amerikës dhe Australisë mbi projektin “Aukus”. Ministri i Jashtëm francez, Jean-Yves Le Drian, deklaroi se me paktin e ri të sigurisë është kryer një shkelje e madhe të besimit, që ka krijuar një krizë serioze në marrëdhëniet mes vendeve.
JEAN-YVES LE DRIAN
MINISTRI I JASHTËM FRANCEZ
“Ka pasur një shkelje të madhe të besimit. Fakti që për herë të parë në historinë e marrëdhënieve në mes të Shteteve të Bashkuara dhe Francës, ne jemi duke thirrur ambasadorët tanë për konsultime, është akt politik serioz, që tregon shkallën e krizës që ekziston mes shteteve tona.”
Por kryeministri australian, Scott Morrison, ka mbrojtur marrëveshjen me Uashingtonin, duke theksuar se ka vepruar sipas interesave kombëtare të vendit të tij.
SCOTT MORRISON
KRYEMINISTËR NË AUSTRALI
“Natyrisht qe është çështje e madhe për ata , ndaj e kuptoj zhgënjimin e tyre. Por në të njëjtën kohë, Australia, sikurse secili komb sovran, duhet të marrë vendime që janë në interesin kombëtar.”
Marrëveshja Aukus, ka rezultuar me anulim të një marrëveshjeje me vlerë 37 miliardë dollarë që Franca ka nënshkruar me Australinë. Franca prej vitesh po punonte për një marrëveshje që do të pajiste Australinë me nëndetëse.
