48-vjeçari që u plagos me armë zjarri mbrëmjen e sotme në Velipojë është Pjerin Brushtulli nga Shkodra.
Brushtulli është plagosur në zonën e plazhit, pranë një resorti, në rrethana ende të paqarta.
Por Pjerin Brushtulli nuk është emër i panjohur për Policinë e Shtetit, pasi në vitin 2002 ka ekzekutuar me armë zjarri për motive gjakmarrje, bashkëfshatarin e tij, Kolec Nushi.
Vite më herët, gjatë kohës së komunizmit, Brushtullit i kanë vrarë edhe babain.
48-vjeçari u dënua në mungesë në vitin 2005 me 15 vite burg dhe u arrestua në vitin 2008.
Nga burimet paraprake mësohet se 48 vjeçari kishte vetëm pak kohë që ishte liruar nga burgu për ngjarjen e vitit 2002.
Në vendngjarje kanë shkuar forca të shumta policie dhe grupe të FNSH Shkodër, është rrethuar zona dhe vijon krehja e saj me qëllim kapjen e autorëve.
Grupi hetimor nën drejtimin e Prokurorisë po vijon punën për zbardhjen dhe sqarimin e plotë të rrethanave të ngjarjes me qëllim identifikimin e autorit/ëve.
