U nis drejt Mynihut, avioni i Marco Rubios pëson defekt, kthehet me urgjencë në Uashington

UASHINGTON– Avioni që po transportonte Sekretarin e Shtetit Marco Rubio dhe kryetarin e Komitetit të Marrëdhënieve me Jashtë të Senatit, Sen. Jim Risch, në Gjermani për të marrë pjesë në Konferencën e Sigurisë së Mynihut u detyrua të kthehej në Uashington të enjten vonë për shkak të një defekti teknik.

“Këtë mbrëmje, gjatë rrugës nga Uashingtoni për në Mynih, avioni me të cilin po udhëtonte Sekretari Rubio pati një problem mekanik”, tha zëdhënësja e Departamentit të Shtetit, Tammy Bruce.

“Aeroplani është kthyer në Uashington,” tha ajo.

“Sekretari synon të vazhdojë udhëtimin e tij në Gjermani dhe Lindjen e Mesme me një avion tjetër.”

Incidenti në bordin e Boeing C-32, një variant i konvertuar i Boeing 757, ndodhi rreth 90 minuta pas fluturimit dhe avioni u ul i sigurt pak para orës 22:00 ET. Autoritetet ende nuk e kanë konfirmuar shkakun e saktë të mosfunksionimit, por sipas një raporti të AP, çështja lidhej me xhamin e kabinës./vizionplus.tv