Një 20-vjeçar shqiptar u kap disa muaj më parë nga policia britanike në Coventry në një shtëpi të mbushur me qindra rrënjë kanabis. Eglison Delibashi u arrestua në muajin prill, pasi gjatë një kontrolli, policia i zbuloi në shtëpi rreth 340 rrënjë kanabis.
I riu mohoi të kishte lidhje me “shtëpinë e barit”, por pasi u përball me provat tha se ishte kërcënuar për t’u marrë me një aktivitet të tillë.
Ai tha se e kishte korrur dy herë kanabisin dhe kjo që u kap ishte hera e tretë. Ai tha se ishte paguar 4000 paund për çdo të korrë kanabisi, të cilat i kishte dërguar në Shqipëri me qëllim financimin e kurimit të së motrës që ishte sëmurë.
Gjykata e dënoi shqiptarin me 8 muaj burg.
