Kampionati turk po josh gjithmonë e më shumë lojtarët shqiptarë.
Vitet e fundit futbolli i këtij vendi e ka parë veten të përfshihet në investime të rëndësishme, sidomos sa i takon infrastrukturës dhe buxheteve financiare të klubeve.
Paratë e shpenzuara nga ekipet turke, veçanërisht ato të superligës kanë joshur emra të mëdhenj të futbollit Europian dhe atij Botëror, si lojtarë dhe trajnerë. E ky trend për të pranuar një transferim në Turqi përfshiu edhe lojtarë shqiptarë.
Shumë emra, përfshirë edhe ata të Kombëtares u sistemuan në dy kategoritë më të rëndësishme të futbollit të këtij vendi, ndërsa të tjerë mund ti bashkohen gjatë kësaj vere. Trabzonspor, Ejupspor dhe Kajzerispor janë klube që kanë shprehur interes për të afruar sulmuesin anësor të Dinamo Zagreb i cili vështirë se mund te qëndroje më në Kroaci. Opsionet e tjera për Hoxhën janë Hull City në Angli dhe Bundesliga 2 në Gjermani.
Por duke mos u larguar nga Turqia, një tjetër sulmuesi kuqezi mund të shtoje radhët e shqiptarëve në këtë vend. Bëhet fjalë për Mirlind Dakun, i cili kishte rënë dakord parimisht për kalimin nga Rubin Kazan tek Zeniti.
Mirëpo detajet e kontratës së Dakut me klubin e madh rus kanë hedhur në erë këtë marrëveshje që dukej e mbyllur në fakt dhe tanimë sulmuesi nga Gjilani është kthyer në opsion për klubet turke.
Rei Manaj do të vazhdojë të qëndrojë në Turqi, por nga Sivaspor ky ishte lojtari më i rëndësishëm në sezonet e fundit. Ai me shumë mundësi do t’a gjeje veten tek Samsuspor. Ky ekip, ku luan edhe një ish kuqezi si Arbër Muja, është kualifikuar në Europë dhe Manaj shihet si një mundësi ideale për të përforcuar sulmin.
/vizionplus.tv
