Një turiste çeke përfundoi në spital pasi u rrëzua duke zbritur me litar në Gjirin e Filikurit.
Komisariati i Policisë Himarë, në bashkëpunim me Policinë Kufitare Himarë, i erdhën menjëherë në ndihmë. Sipas njoftimit zyrtar, turistja ndodhet jashtë rrezikut për jetën.
“Sot, pas marrjes së njoftimit se një turiste çeke, gjatë zbritjes me litar në terren shkëmbor, ishte rrëzuar dhe kërkonte ndihmë, shërbimet e patrullës së Rendit dhe ato të Policisë Kufitare organizuan punën dhe kaluan menjëherë në vendin e raportuar.
Pas lokalizimit të turistes, u bë e mundur zbritja e saj në mënyrë të sigurt nga shkëmbinjtë dhe transportimi me mjetin lundrues të Policisë Kufitare drejt portit të Himarës, e më pas drejt qendrës shëndetësore, për kontroll mjekësor ku ndodhet jashtë rrezikut për jetën.
Policia apelon që vizitorët dhe pushuesit, gjatë eksplorimeve në terrene të vështira, të tregojnë kujdes maksimal dhe të marrin masat e nevojshme për sigurinë e tyre.
Shërbimet e Drejtorisë Vendore të Policisë Vlorë dhe të Policisë Kufitare janë të angazhuara maksimalisht për të garantuar rendin, sigurinë dhe për t’u ardhur në ndihmë qytetarëve dhe pushuesve, në çdo rast nevoje”, thuhet në njoftim.
/vizionplus.tv
