Trump zhvendoset nga Nju Jorku në Florida
Presidenti amerikan, Donald Trump duket se ka vendosur që të ndryshojë adresën e tij të banimit nga Nju Jorku në Florida, pasi të largohet nga Shtëpia e Bardhë.
Përmes një postimi në Twitter, Trump shkruan se adresa “1600 Pennsylvania Avenue, Shtëpia e bardhë, është vendi që dua dhe ku shpresoj se do të qëndroj për pesë vjetët e ardhshëm. Mirëpo familja ime dhe unë do ta ndryshojmë adresën tonë të përhershme në Palm Beach në Florida”.
E përditshmja amerikane, The New York Times, ka raportuar se Trump, tashmë ka nisur procedurat për ndryshim të adresës së përhershme.
Kjo gazetë ka thënë se zyrtarët e Shtëpisë së Bardhë nuk kanë treguar pse Trump ka ndryshuar adresën fillestare, mirëpo ka cituar një person të afërt me presidentin të ketë thënë se arsye janë taksat.
