Pas bisedimeve me sekretarin e përgjithshëm të NATO-s Mark Rutte, presidenti i SHBA-ve Donald Trump ka deklaruar se nuk do të vendosë tarifat që ishin planifikuar të hynin në fuqi më 1 shkurt, ndaj 8 vendeve evropiane që do t’i ofronin ndihmë Groenlandës .
“Bazuar në një takim shumë produktiv që kam pasur me Sekretarin e Përgjithshëm të NATO-s, Mark Rutte, kemi formuar kornizën e një marrëveshjeje të ardhshme në lidhje me Groenlandën dhe në fakt, me të gjithë Rajonin Arktik. Kjo zgjidhje, nëse arrihet, do të jetë një zgjidhje e shkëlqyer për Shtetet e Bashkuara të Amerikës dhe të gjitha vendet e NATO-s. Bazuar në këtë mirëkuptim, unë nuk do të vendos Tarifat që ishin planifikuar të hynin në fuqi më 1 shkurt”, tha Trump.
Por menjëherë ka ardhur përgjigjja e kryeministres daneze Mette Frederiksen. Ajo theksoi se vetëm Danimarka dhe Groenlanda mund të vendosin për sovranitetin e vendit.
“Ne kemi qenë në dialog të ngushtë me NATO-n dhe kam folur vazhdimisht me Sekretarin e Përgjithshëm të NATO-s Mark Rutte, duke përfshirë si para ashtu edhe pas takimit të tij me Presidentin Trump në Davos. NATO është plotësisht në dijeni të qëndrimit të Mbretërisë së Danimarkës. Ne mund të negociojmë për gjithçka politike; sigurinë, investimet, ekonominë. Por nuk mund të negociojmë për sovranitetin tonë. Jam informuar se as ky nuk ka qenë rasti. Dhe sigurisht, vetëm Danimarka dhe Groenlanda mund të marrin vendime për çështjet që kanë të bëjnë me Danimarkën dhe Groenlandën”, tha Frederiksen.
Një ditë më parë kreu i Shtëpisë së Bardhë në një fjalim në samitin ekonomik të Davosit tha se SHBA-të nuk do të përdorin forcën për të marrë Groenlandën, duke përjashtuar përdorimin e ndërhyrjes ushtarake për të aneksuar ishullin Arktik.
