Presidenti i Shteteve të Bashkuara të Amerikës, Donald Trump, prezantoi strategjinë e tij të sigurisë kombëtare, ku e vendosi theksin tek Kina dhe Rusia si kërcënimet kryesore të SHBA-se.
“Ne, ballafaqohemi me fuqitë rivale Rusia dhe Kina, të cilat synojnë ta sfidojnë ndikimin, vlerat dhe mirëqenien amerikane. Ne do të përpiqemi të ndërtojmë partneritet të madh me këto dhe vendet e tjera, por në mënyrën që gjithnjë i mbron interesat tona kombëtare.”
Platforma e Trump “Amerika e Para”, sulmon dështimet e shkuara të politikës së jashtme. Sipas presidentit amerikan, liderët e mëparshëm nuk ishin kujdesur për fatin e Amerikës, ndërsa sot ai tha se ndihet krenar që e gjithë bota flet për të.
“Prej më pak se një viti, jam krenar të raportoj se e gjithë bota e di çfarë është duke ndodhur. Amerika po kthehet sërish dhe Amerika po kthehet fuqishëm. Për të parën herë strategjia amerikane pranon se siguria ekonomike është siguri kombëtare. Vitaliteti, rritja dhe prosperiteti ekonomik në shtëpi, është absolutisht e domosdoshme për fuqinë amerikane dhe ndikimin e jashtëm.”
Presidenti Trump lavdëroi koalicionin e udhëhequr nga Shtetet e Bashkuara, i cili po lufton kundër grupit ekstremist, Shteti Islamik, në Irak dhe Siri. Ai shtoi se Pakistani, duhet të jetë më i vendosur në betejën kundër ekstremizmit.
Presidenti u ndal edhe tek kërcënimet e regjimeve të papërgjegjshme, si Koreja e Veriut.
Katër shtyllat e planit të tij, që pasqyrojnë mbrojtjen e atdheut, promovimin e begatisë së SHBA-se, demonstrimin e paqes përmes forcës dhe avancimin e influencës amerikane, u kritikuan ashpër.
Kjo, pasi Trump nuk përmendi të drejtat e njeriut e as ndryshimet klimatike, gjë të cilën ish presidenti Barack Obama, e cilësoi si një “kërcënim urgjent dhe në rritje për sigurinë kombëtare”.
Ndërkohë, agjencia zyrtare kineze e lajmeve, Xinhua, shkruan se cilësimi nga Trump i Pekinit “si rival” është fitore për pjesëtarët e linjës së forte. Ai po ashtu reflekton hezitimin e Uashingtonit për ta pranuar realitetin e rritjes së Kinës.
