Presidenti i SHBA, Donald Trump, ka mbajtur fjalën e tij përpara liderëve botërorë në Forumin e Ekonomisë që po zhvillohet në Davos.
Gjatë fjalës së tij, ai i ka kërkuar Arabisë Saudite që të ulë çmimin global të naftës në mënyrë që t’i japë fund luftës mes Rusisë dhe Ukrainës.
Ai tha se sauditët dhe OPEC (Organizata e Vendeve Eksportuese të Naftës) janë “përgjegjës deri në një masë” për vazhdimin e luftës.
“Jam i habitur që nuk e bënë këtë para zgjedhjeve, duhet të tregoni pak dashuri. Nëse çmimi do të ulej, lufta Rusi-Ukrainë do të përfundonte menjëherë. Tani për tani, çmimi është mjaft i lartë sa që lufta do të vazhdojë. Duhet të ulni çmimin. Ata duhet ta kishin bërë shumë kohë më parë. Ata janë shumë përgjegjës deri në një masë, miliona jetë po humbasin”, tha Trump.
Evropa ka braktisur produktet ruse të naftës që nga pushtimi i saj në shkallë të plotë të Ukrainës në shkurt 2022.
Megjithatë, Moska ka mundur të gjejë tregje të tjera për naftën e saj, si India dhe Kina, duke e lejuar atë të vazhdojë financimin e luftës së saj.
