Trump kundërshton datën e gjyqit: Vendim i njëanshëm, do ta apeloj
Donald Trump ka deklaruar se do të apelojë vendimin e gjykatëses federale Tanya Chutkan, për datën e gjyqit të tretë të tij, në mars të vitit të ardhshëm.
Përmes një reagimi në rrjetin ‘Social Truth’ ish kreu i Shtëpisë së Bardhë akuzoi gjyqtaren si të njëanshme dhe se sipas tij, ajo ka vendosur pikërisht datën që qeveria amerikane do të donte.
Gjykatësja federale e çështjes kundër ish-presidentit Donald Trump në Uashington vendosi 4 marsin 2024 si datën e gjyqit ndaj tij mbi akuzat se u përpoq të përmbyste rezultatin e zgjedhjeve të vitit 2020. Kjo datë përkon vetëm një ditë para ditës kur në mbi 12 shtete në SHBA, zhvillohen primaret për zgjedhjet presidenciale.
Vendimi i gjykatëses, Tanya Chutkan do të thotë se Trump do t’i duhet të dalë në gjyq në të paktën tre çështje të veçanta penale brenda pak muajve, ndëkohë që vijon fushatën për primaret brenda partisë Republikane.
Chutkan tha se data 2 janar 2024 e propozuar nga Prokurori i posaçëm Jack Smith për fillimin e gjyqit, ashtu edhe prilli 2026 që kanë propozuar avokatët e zotit Trump, janë të papranueshme.
Trump pritet gjithashtu të dalë në gjyq në Nju Jork më 25 mars lidhur me akuzat se ka paguar një aktore të filmave për të rritur, për t’i mbyllur gojën asaj.
