SHBA njoftuan sot rifillimin e punës në ambasadën e tyre në Venezuela, shtatë vjet pas mbylljes së saj dhe pothuajse tre muaj pas arrestimit të presidentit Nicolas Maduro gjatë një operacioni ushtarak.
“Sot, rifillojmë zyrtarisht aktivitetin e Ambasadës së Shteteve të Bashkuara në Karakas, duke shënuar një fazë të re në praninë tonë diplomatike në Venezuelë”, njoftoi Departamenti i Shtetit.
Që nga arrestimi i Maduros, nënpresidentja Delcy Rodríguez ushtron detyrën si presidente e përkohshme dhe qeveris nën presionin e Washington, ndërsa presidenti Donald Trump ka shprehur interes të madh për rezervat e mëdha të naftës të vendit.
Rihapja e ambasadës në Karakas do të “forcojë” aftësinë e Uashingtonit “për të bashkëpunuar drejtpërdrejt me qeverinë e përkohshme të Venezuelës, shoqërinë civile dhe sektorin privat”, theksohet në deklaratën e Departamentit të Shtetit.
Departamenti amerikan i Shtetit sqaroi se drejtuesja e misionit diplomatik të SHBA-së, e ngarkuara me punë Laura Dogu, po mbikëqyr riparimet në ndërtesën e ambasadës “me qëllim përgatitjen, sa më shpejt të jetë e mundur, për rikthimin e plotë të stafit dhe rifillimin e shërbimeve konsullore”.
Shtetet e Bashkuara ndërprenë marrëdhëniet diplomatike me Karakasin në vitin 2019, pak pasi e cilësuan të paligjshëm rizgjedhjen e Nicolás Maduro-s pas zgjedhjeve që u konsideruan gjerësisht të manipuluara.
Që atëherë, misioni diplomatik amerikan për Venezuelën kishte selinë në Kolumbia. Laura Dogu, një diplomate karriere, mbërriti në Karakas në janar për të marrë drejtimin e ambasadës, ku flamuri amerikan u ngrit më 14 mars.
