Ish-kryetari i KQZ, Arben Ristani ka besim se presidenti Ilir Meta nuk i ngre kot tonet për Vlorën.
Duke risjellë në vëmendje rastin e Dibrës, ku mazhoranca akuzohet për manipulim të votave, Ristani tha për “Zgjedhje 2021” në “Vizion Plus” se Meta di më shumë gjëra sesa aktorët e tjerë politikë, për shkak edhe të postit që ka.
“Kur flasim për presidentin, duhet të kuptojmë që ai ka shumë më tepër informacion sesa ne. Si njeri që është marrë me politikë, kemi precedent të tjerë, si ai i Dibrës. Rama është me precedentë në manipulimin e votave. Presidenti është një qytetar i këtij vendi. Presidenti ka në dorë fjalën. Fjala e presidentit ka peshë. Ai mund ta përdorë fjalën me vend, për mbrojtjen e zgjedhjeve të lira dhe të ndershme. Nuk kam informacione për klimë të tensionuar në Vlorë.”
Kreu i shtetit doli përpara mediave këtë të enjte për t’i dërguar një mesazh Edi Ramës e Damian Gjiknurit e për t’i paralajmëruar se plani i tyre për Vlorën, ka dështuar. Madje, ai shtoi se do jetë në Vlorë deri në numërimin e votës së fundit.
