Pas afro 7 javësh luftime në Ukrainë trupat ruse po rigrupohen në lindje të vendit.

 

Pamjet të publikuara nga qytetet që ishin të kontrolluara nga ushtarët rusë shfaqin ndërtesa, shtëpi dhe rrugë pothuajse plotësisht të shkatërruara.

 

Kostantin Bondariev, një deputet i opozitës në Ukrainë thotë për Vizion Plus, situata është tronditëse.

 

KOSTIANTYN BONDARIEV

DEPUTET I OPOZITES NE UKRAINE

 

“Jo shumë larg nga Kievi janë qytezat Irpin dhe Borodianka. Ky territor për afërsisht dy javë ishte i kontrolluar nga rusët. Situata është shumë e keq atje pasi nuk ka elektricitet, s’ka akses në produktet bazë të jetesës, as ujë, dhjetëra shtëpi të shkatërruara. Shumë njerëz kanë arritur të evakuohen, por situata ishte shumë e vështirë pasi Rusia e bënte të pamundur një gjë të tillë. Shumë njerëz vdiqën në tentativë për t’u larguar nga këto qytete.”

 

Dialogu mes Rusisë dhe Ukrainës, është pezulluar pas pretendimeve se në Bucha janë vrarë 300 civilë nga ushtarët rusë. Deputeti ukrainas nënvizoi se procesi është shumë i vështirë dhe se mund të jetë i suksesshëm vetëm nëse Kremlini tërheq të gjitha trupat.

 

KOSTIANTYN BONDARIEV

DEPUTET I OPOZITES NE UKRAINE

 

“Sot është një situatë e vështirë. Qytetarëve u është prishur shtëpia ose kanë humbur familjarët e tyre. Si është e mundur që të ketë sot bisedime me putin. Po flasim për një situatë shumë të rëndë. Besoj se duhet pak kohë. Ne duhet të flasim vetëm kur trupat ruse të jenë kthyer në territorin e tyre.”

 

Parlamenti ukrainas ka ndërmarrë masa për mbështetjen e ushtrisë, por Bondariev theksoi se nuk janë të mjaftueshme.

 

KOSTIANTYN BONDARIEV

DEPUTET I OPOZITES NE UKRAINE

 

 “Ne kemi marrë masa për të ndihmuar ushtrinë nga buxheti i shtetit. Por është shumë e vështirë për ne nëse qielli vazhdon të jetë i hapur. Ne kërkojmë që qielli të mbyllet, sepse Rusia po na sulmon nga ajri. Kërkojmë pajisje, ne aktualisht nuk kemi armë të posaçme.”

 

Edhe pse më parë ka qenë kritik ndaj zgjedhjes së presidentit Volodymyr Zelenskiy në krye të shtetit Bondariev vuri në dukje se në këtë kohë lufte të gjithë janë të bashkuar kundër një armiku të vetëm,Rusisë.

 

 

 

Leave a Reply

Your email address will not be published.