Popullsia e Shqipërisë vijon te tkurret. Për të tretin vit më radhë, popullsia shënoi rënie. Kjo renie ne 2018 arriti ne 0.3 % ose rreth 7900 banorë më pak se fillimi i vitit. Sipas të dhënave të fundit nga INSTAT, numri i popullsie në fund të vitit që lamë pas arriti në 2 milion e 862 mijë banorë.
Ky trend qe ka nisur vitet e fundit ka dy shkaqe kryesore, atë të reduktimit të numrit të lindjeve si dhe nivel i lartë i emigracionit. Shtesa natyrore e popullsisë në vitin që lamë pas arriti në 7130 banorë, një rënie kjo me 17.4% krahasuar me 2017. Tendencë rënëse është vërejtur edhe tek numri i lindjeve. Në 2018 kanë lindur 6.3 % foshnje më pak se viti paraardhës.
Gjatë këtij viti qeveria ka nisur të zbatojë politiken sociale atë të dhënies së bonusit për familjet që lindin deri në tre fëmije, një bonus që nis me 40 mijë lekë për fëmijën e parë e deri në 120 mijë lekë për foshnjën e tretë. Kjo politikë ka si synim nxitjen për shtimin e popullsisë. Paralelisht me këtë situatë edhe pse emigrimi ka shënuar rënie në raport me 2017, sërish niveli konsiderohet i lartë.
Popullsia ka shënuar rënie në të gjitha qarqet, vetëm Tirana dhe Durrësi tendenca është në rritje. Tirana, Fieri dhe Durrësi kanë peshën më të lartë në popullsinë e vendit.
Në një janar 2019, Tirana zë rreth 31,3 % të popullsisë gjithsej, duke vazhduar të jetë një nga qarqet më të populluara të vendit.
