Ish-presidenti i Shteteve të Bashkuara të Amerikës, Donald Trump, mund të përballet me një tjetër padi civile, kjo pasi shkrimtarja XHIN KEROL, i është drejtuar trupit gjykues me një shkresë që e akuzon ish-kreun e Shtëpisë së Bardhë për shpifje.
Në fakt, padia e ngritur lidhet me deklaratat e Trumpit gjatë intervistës që ai dha për CNN, menjëherë pas vendimit të gjykatës së Manhatan.
“Çështja e XHIN KEROL është shumë e çuditshme. Këtë grua, nuk e njoh. Nuk e kam takuar kurrë. Nuk e kam idenë se kush është ajo. Ajo është e çmendur” – këto ishin fjalët e ish-presidentit që e kanë zëmëruar shkrimtaren.
Deklaratat e ish-presidentit pas shpalljes së vendimit tregojnë thellësinë e keqdashjes së tij ndaj Kerol, thanë avokatët e saj në padinë e re. “Ajo po kërkon dëmshpërblim për të ndëshkuar Trump, por edhe për ta parandaluar atë nga përfshirja në veprime të tjera” – është shprehur një nga përfaqësuesit e ekipit ligjor të avokates.
Një ditë përpara transmetimit të CNN, presidenti i 45-të i Shteteve të Bashkuara ishte shpallur fajtor për sulm seksual ndaj shkrimtares, e cila e akuzoi atë për përdhunimin në Nju Jork, në pranverën e vitit 1996.
Juria vendosi që ish-presidenti Amerikan t’i paguajë shkrimtares 5 milionë dollarë, ku 2 milionë janë për abuzimin seksual dhe 3 milionë për shpifjen që ai bëri duke thënë se shkrimtarja po gënjente.
