Qarkullimi i variantit “Delta” në Kosovë është pasuar me valën më të ashpër të pandemisë që ka parë vendi deri më tani. Edhe këtë të martë, bilanci i viktimave është tronditës, 26 pacientë e humbën betejën me sëmundjen, ndërsa u infektuan më shumë se një mijë persona.
Për t’iu përgjigjur kërkesës në rritje, edhe reparti i sëmundjeve pulmonare është vendosur në funksion të të sëmurëve me covid 19. Kapacitetet janë plotësuar thuajse tërësisht ndërsa kanë mbetur vetëm dy shtretër të lirë.
Shefi i këtij reparti, Musa Hoxha bën të ditur se 90% e pacientëve po trajohen me terapi oksigjeni.
MUSA HOXHA
DREJTOR I REPARTIT TE SEMUNDJEVE PULMONARE
“Aktualisht sot i kemi 87 të shtruar dhe dy vende të lira dhe komplet klinika është COVID pozitiv me raste të infektuara. Janë të infektuara me variantin Delta. Gjendja e pacientëve tanë në Klinikën e Pulmologjisë në përgjithësi është stabile përveç katër rasteve që janë pak më të rënda dhe kërkojnë përkrahje më të madhe me oksigjenoterapi, kurse pjesa tjetër është stabile edhe pse edhe pjesa tjetër mbi 90% janë me oksigjenoterapi dhe terapi tjetër mbështetëse”.
Shefi i repartit të sëmundjeve pulmonare nënvizon se pjesa më e madhe e të sëmurëve me sars cov2 janë të pavaksinuar, ndërsa pacientët e vaksinuar janë në gjendje më të qëndrueshme krahasuar me të tjerët.
“Nga të shtruarit që i kemi ne i kemi për momentin 9 të vaksinuar me një dozë dhe gjashtë i kemi të vaksinuar me dy dozat, nga ata 15, nga numri i përgjithshëm 87 që janë, ata janë në gjendje më stabile dhe gjendja e tyre është më e lehtë, edhe klinike, por edhe sa i përket ndërrimeve radiologjike në rentgen që shihen janë më të pakta. Pjesa më e madhe do thotë mbi 80% janë të pa vaksinuar”.
Autoritetet shëndetësore në vend prej ditësh tashmë, kanë ngritur alarmin mbi mungesën e shtretërve të lirë, ndërsa shefi i shërbimit spitalor ka deklaruar se do të shkurtohen të tjera shërbime mjekësore më pak esenciale.
