Tirana leksion Partizanit, derbi i basketbollit është “bardheblu”, Vllaznia mund Elbasanin
Suksesi në derbi kundër Partizanit ka kompletuar startin perfekt të Tiranës në kampionatin kombëtar të basketbollit për femra.
Vajzat bardheblu i kanë fituar të treja ndeshjet e edicionit të ri duke u konfirmuar si një prej skuadrave pretendente kryesore për fitimin e titullit kampion.
Në derbin e zhvilluar në pallatin e sportit Asllan Rusi, kampionet në fuqi fituan me distancë plus 22 kundrejt një rivali direkt për titull sikurse Partizani.
Këto të fundit madje e kishin nisur shumë mirë takimin duke fituar periodën e parë me rezultatin e thellë 19 me 8.
Mirëpo në periodën e dytë kthesa e vajzave të drejtuara nga Mirza Alibegaj ishte impresionuese.
Tirana fitoi këtë periodë 26 me 15, duke shkuar në pushim të takimit me një barazim perfekt 34 me 34.
Megjithatë pushimi i sfidës nuk e ndryshoi ritmin e vajzave bardheblu e as nuk e shpëtoi Partizanin që u mposht në distancë edhe më të madhe në periodën e tretë -*16 pikë, konkretisht 29 me 13.
Në fazën finale të takimit Tirana administroi suksesin duke fituar edhe periodën e fundit 19 me 13 dhe të gjithë sfidën 82 me 60.
Diferencën tek vajzat bardheblu e bëri Alexxus Davis me 22 pikë dhe 12 kërcime. Sukses i bukur edhe i Vllaznisë me rezultatin e thellë 79 me 59 kundër Elbasanit në fushën e kësaj të fundit.
