Kryeministri Edi Rama dha një përgjigje edhe për të gjithë ata që kërkojnë që të bëhen më shumë testime për të parandaluar infeksionin. Gjatë fjalës që mbajti në lagjen “5 Maji” ku u hap kantieri i parë i ndërtimit pas tërmetit, Rama tha se qeveria bën atë që i thonë ekspertët e shëndetësisë.
“Thonë bëj testime më shumë që të ndalojmë infeksionin. Pse nuk e ndalon Franca infeksionin, pse nuk e ndalon Gjermania? Kush jemi ne, kush jam unë, kush janë politikanët që të vendosin sa testime bëhen? Ne thjesht dhe vetëm kemi detyrimin t’u përgjigjemi atyre që janë në krye të detyrës, që janë ekspertët që e kanë me profesion dhe me ligj detyrën që na tregojnë se çfarë duhet të bëjmë. Situata është jashtëzakonisht e ngatërruar në çdo aspekt, por në këtë situatë qeveria është e qartë, e durueshme dhe di se çfarë bën. I mirëkuptoj plotësisht në padurimin e tyre njerëzit, sidomos ata që presin të kthehen në shtëpi. Këto nuk i kam për këta, por për ata që flasin e flasin për vonesa. Çfarë vonesash? Nga 26 Nëntori nuk është bërë akoma viti dhe kemi vënë në dispozicion buxhetin e shtetit.”
Opozita kërkon çdo ditë që të shtohet numri i testimeve për të gjurmuar kontaktet e rasteve. Kryedemokrati Lulzim Basha kërkon që të ketë të paktën 2.500 testime në ditë.
