Për Dashimir Shehin, qeveria Rama instaloi regjimin me të rrezikshëm që ka pasur ndonjëherë Shqipëria.
Kreu i LZHK-së tha në “Quo Vadis” se gjendja në të cilën ndodhet Shqipëria duhet t’i bëjë shqiptarët që të reflektojnë dhe të votojnë për të duhurin në zgjedhjet e 25 prillit.
“Është një vjedhje pra, 30 vjecare, prandaj po them që ky është regjimi më i rrezikshëm që i ka ardhur ndonjëherë Shqipërisë. Nuk po i quaj ëngjëj ata që ishin më përpara. Edhe ata mund ta kenë ndyer pak dorën tek xhepi publik, po me kontrata 30 vjet, të na vjedhin hajdutët e Edi Ramës edhe pas 30 vjetëve, ky është një turp që duhet ti vendosin gishtin kokës shqiptarët kur shkojnë tek kutia e votimit.”
Sipas tij, ndryshimet në kodin e ri elektoral e dëmtojnë opozitën.
“E dëmtojnë! Nuk është bërë asnjë gjë në favor të opozitës, më vjen keq që lufta nuk ishte ashtu si e mendonim. Unë kam menduar që duhet të kishim, dhe vazhdojë të mendoj, se nuk është se mbyllet politika as me këto zgjedhje, as me ne, gjeneratën tonë. Cështë ky ligj i cuditshëm që e ndanë Shqipërinë në rajone? Gjithnjë më është dukur një karikaturë politike. Ne kemi nevojë për një ligj që ta bashkojë Shqipërinë, një listë kombëtare. Një listë! Ne përvec ndarjeve që kemi pasur në mënyrë tradicionale, toskë, gegë, tashmë na ka hyrë pak edhe feja, me ndihmën e politikës, tashmë ne sajuam edhe disa ndarje me dorën tonë, disa ndarje rajonale.”
