Në kuadër të takimeve të shumta në sesionin e Asamblesë së Përgjithshme në Nju Jork, presidenti i Republikës së Kosovës, Hashim Thaçi, së bashku me Ambasadoren e Kosovës në SHBA, Vlora Çitaku, kanë zhvilluar një takim të veçantë edhe me ish-guvernatorin e Floridës, Jeb Bush.
Duke u mbështetur në kompetencat e tij kushtetuese dhe në emër të popullit të Kosovës, Presidenti i Kosovës i ka dorëzuar ish-guvernatorit Bush, Medaljen Jubilare të Dhjetëvjetorit të Pavarësisë, e cila i është dedikuar familjes Bush për kontributin e tyre përcaktues për lirinë dhe pavarësinë e Kosovës.
Përveç presidentit Bush të vjetër, presidenti Thaçi ka kujtuar edhe kontributin e presidentit George W. Bush, në jetësimin e aspiratës për Kosovën e pavarur.
Presidenti Thaçi, po ashtu, e ka ftuar ish-guvernatorin e Floridës që ta vizitojë Kosovën.
Nga ana tjetër, Jeb Bush, e ka falënderuar presidentin Thaçi për medaljen, duke e vlerësuar respektin që populli i Kosovës ka për familjen Bush.