Njeriu i akuzuar për vrasjen e 50 personave në sulmet e muajit të kaluar në dy xhami në Christchurch të Zelandës së Re, do ti nënshtrohet ekzaminimeve të shëndetit mendor. Ai do të shihet nga ekspertët për të vendosur nëse është i aftë për t’u gjykuar ose i sëmurë mendor, tha gjyqtari i gjykatës së lartë, Cameron Mander.
Australiani Brenton Tarrant, 28 vjeç, u shfaq në sallën e gjyqit, nëpërmjet lidhjes me video nga burgu. Sipas mediave ai mbahet në burgun më te sigurte në Oklend.
28-vjeçari është shfaqur i qetë, ndërsa gjatë seancës policia ka ndërmarrë masa jashtë gjykatës.
Në séance e së premtes gjykatësi caktoi paraburgim deri më 14 qershor në burgun e sigurisë së lartë. Gjykatësi Mender kërkoi dy raporte të veçanta për shëndetin e tij mendor dhe theksoi se raportet për shëndetin mendor janë procedurë normale dhe kjo nuk duhet të keqinterpretohet.
Më 15 mars, Tarant hyri në xhaminë Al Nor dhe hapi zjarr ndaj besimtarëve. Sulmuesi më pas për shtatë minuta ka shkuar deri tek xhamia tjetër në periferinë Linvud, ku vazhdoi masakra. Tridhjet e gjashtë minuta pas alarmit të parë për sulmin, Tarant është arrestuar në automjetin ku, sipas policisë, ka pasur mjete të improvizuara shpërthyese.
Ky është sulmi me më shumë viktima që ka parë ndonjëherë në Zelanda e Re.
