Arbër Çekaj dhe një nga anëtarët e bandës së “Babagjyshëve”, Fatmir Pjetri, të cilët tentuan të arratiseshin nga burgu “313” në Tiranë ditën e djeshme, janë vendosur në izolim për 90 ditë.
Sipas ligjit, Çekaj e Pjetri do të izolohen për 90 ditë dhe nuk do të kenë kontakte me familjarë apo të burgosur të tjerë.
Mësohet se arratisja ka qenë e planifikuar prej disa javësh. Ata kanë qenë në zonën e ajrimit kur kanë tentuar arratisjen, por plani iu ka dështuar.
Çekaj u dënua nga apeli i GJKKO-së me 14 vite burg, pasi kompanisë së tij iu kap një sasi prej 613 kg kokainë në shkurt të 2018-ës në Maminas. Asokohe, Çekaj u arrestua në Gjermani dhe një vit më pas është ekstraduar drejt Shqipërisë ku kanë filluar hetimet lidhur me transportin e kokainës.
Nga ana tjetër, Fatmir Pjetri ka qenë pjesë e një grupi kriminal “Babagjyshët”, i cili gjatë periudhës janar-dhjetor të vitit 2013 dhe në vazhdim, në qytetet e Tiranës, Laçit, Fushë-Krujës, Kuçovës dhe Durrësit kanë grabitur me armë disa argjendari në këto qytete.
