Pas kryetarëve të bashkive, kryeministri Edi Rama, mbledh ministrat për t’u komunikuar të njëjtin mesazh, se çdo rast i abuzimit me tenderat në institucionet që ata drejtojnë do të përfundojë në SPAK.
“Gjithë sistemi i prokurimeve publike duhet rrethuar me një mur të lartë për të penguar penetrimin e gjithë agjentëve atmosferikë, politik, mediatik, ekonomik social dhe kulturor.”
Si kryetarët e bashkive, ashtu edhe ministrat, theksoi kreu i qeverisë mbajnë të njëjtën përgjegjësi në përmbushjen e kritereve ligjore për prokurimet publike.
“Titullarët e autoriteteve kontraktore janë përgjegjës direkt për menaxhimin e fondeve.”
Si shqetësuese, kreu i qeverisë, veçoi mosreagimin e institucioneve pas rekomandimeve të Agjencisë së Prokurimeve Publike për parregullsitë e vërejtura në tendera.
“Çdo rast i tillë do të shkojë në SPAK dhe do të shkojë nga kjo godinë këtu. A është i qëllimshëm a është injorancë në raport me etikën shtetërore, këtë çështje indiferentët përkatës, ta shpjegojnë duke marrë avokat me vete.”
Referuar të dhënave të një raporti të Agjencisë së Prokurimeve Publike për periudhën Janar 2020 – Prill 2021, kryeministri risolli në vëmendje atë që ai e quan kanceri që po ha para, prokurimet publike me negocim të drejpërdrejt dhe vendosjen e kritereve të veçanta që çojnë në përjashtimin e operatorëve ekonomik, duke bërë që deri në 50 për qind të rasteve fituesi i tenderave të jetë i njëjti.
“Që autoritetet kontraktore duhet të monitorojnë edhe sjelljen e operatorëve ekonomik, tërheqjen nga gara, nënshkrimet e kontratave, rrotacionet ne ofertim, ofertimet fiktive, duhet të marrin masa për të referuar rastet në institucionet përkatëse për hetime administrative dhe kur e shohin të arsyeshme, autoritetet kontraktore t’i adresojnë edhe në organet e prokurorisë.”
Paralajmërimet e Edi Ramës se kushdo që abuzon me tenderat do të përballet me drejtësinë, vjen pas arrestimit të 9 zyrtarëve dhe ish zyrtarëve të Ministrisë së Brendshme për tenderin e uniformave të policisë, ngjarje për të cilën kryeministri nuk bëri asnjë reagim.
