Teliti: 1.500 persona humbasin punën çdo ditë, qeveria u jep lugën bosh

Përfaqësuesi i PD për çështjet ekonomike, Dorjan Teliti akuzoi qeverinë se nuk po bën asgjë për popullin, por po ofron vetëm propagandë.

Sipas tij, çdo ditë po humbasin vendin e punës 1.500 qytetarë. Ai akuzoi mazhorancën qeverisëse se vetëm po tallet me hallet e tyre.

“Shteti duhet të ofrojë mbështetje urgjente pasi çdo ditë të paktën 1500 persona humbasin punën e qindra mijëra familje janë në kufijtë e mbijetesës. Qytetarët kërkojnë mbështjetje, përmes parave që po ata mbushin arkën e shtetit përmes taksave që paguajnë çdo muaj. Shqiptarët i kërkojnë qeverisë t’i kthejë detyrimin që ka ndaj tyre në këto kohë të vështira, ku me urdhër të qeverisë ata po humbasin çdo gjë. Shteti vijon e tallet ndërsa ju jep lugën bosh dhe ekranet plot me propagandë ku u thuhet se u është dhënë gjithcka ka shteti dhe se aq kishte.”

Për demokratin, nëse vijohet në këtë situatë, atëherë varfëria do të përhapet me shpejtësi dhe shpresa do të vritet.