Edhe këtë të martë kryeministri Edi Rama e nisi ditën në rrjetet sociale me një shënim për debatin e madh për Teatrin Kombëtar.
Duke vënë në dukje transformimin e Teatrit të Operas dhe Baletit, Rama tha se fiks aty ka nisur beteja për një teatër të ri thuajse dy dekada më parë.
“Dje, duke vizituar kantierin e Teatrit të ri të Operas dhe Baletit, ku po përfundon një transformim fantastik brenda asaj hapesire deri dje të degraduar që turpëronte Shqipërinë e shtetin e saj, m’u kujtua që 21 vjet më parë, tamam në të njëjtin vend mbi skenë, nisi beteja publike për reformimin e sistemit teatror shqiptar dhe rindërtimin me themel të skenës kombëtare e të vetë Teatrit Kombëtar… Sa shumë energji të harxhuara e vite të humbura kot për komunitetit tonë teatror, që qysh atëherë kaloi edhe 20 vjet të tjera në kushtet e një mizerjeje pa të dytë në Europë dhe sa keq për publikun artdashës, që nuk pati dot kurrë mundësinë të shijonte artet skenike në kushte dinjitoze as në TKOB e as në Teatrin Kombëtar!”
Kreu i qeverisë shpreh keqardhjen që shumë aktorë e artistë të shquar u larguan nga kjo jetë pa punuar dot, sipas tij, në një skenë të denjë.
Për protestat e artistëve dhe të opozitës, Rama shprehet i sigurtë se shumë shpejt do ta kuptojnë që gjithë debati është i kotë.
“Sa keq që tërë ato yje të skenës sonë kombëtare u shuan, pa punuar dot një ditë në një skenë normale dhe një gjeneratë e tërë u moshua, pa shijuar dot kurrë një shfaqje në kushte normale! Skenat e reja kombëtare, kjo e Operas e Baletit dhe ajo e Teatrit Kombëtar, përveç të tjerash do t’i ndihmojnë edhe disa të rinj që gabimisht u janë “bashkuar” ca politikanëve e partive si tallashi e teneqeja e ngrehinës së shembur, të kuptojnë nesër pse sot ia fusin krejt kot, kur revoltohen për monumentin imagjinar që mbajti peng artet skenike, komunitetin teatror dhe debatin për Teatrin e Ri Kombëtar, tash 21 vjet🙏”
Të hënën u mbajt protesta e dytë e organizuar nga Aleanca për Mbrojtjen e Teatrit, ndërsa është paralajmëruar një tjetër tubim të mërkurën.
