Dy shtetas shqiptarë janë arrestuar në Greqi dhe dhe Çeki, të cilët ishin shpallur në kërkim ndërkombëtar.
Policia bën me dije se 63-vjeçari Pëllumb Braçe, i cili u ndalua në Kavala të Greqisë është dënuar nga Gjykata e Durrësit me 15 vjet burgim, pasi ka mashtuar dy shtetas duke u marrë 72 mijë euro për shitjen e një dyqani në qytetin bregdetar.
Po ashtu, në pranga është vënë edhe 38-vjeçari Albert Lamaj. Ndalimi i tij u bë në Çeki. Ai është dënuar nga Gjykata e Sarandës me dy vite burgim për plagosje të një personi në vitin 2017.
Dy të arrestuarit, do të dërgohen në Shqipëri ku do të buajnë dënimin që u është caktuar.
Interpol Tirana
Falë shkëmbimit të informacionit mes Interpol Tiranës dhe homologëve grekë dhe atyre çekë, lokalizohen në Greqi dhe në Çeki, kapen dhe arrestohen përkohësisht, 2 shtetas shqiptar në kërkim ndërkombëtar, me qëllim ekstradimi drejt Shqipërisë.
-Si rezultat i shkëmbimit të informacionit mes Interpol Tirana dhe autoriteteve policore greke, u bë lokalizimi në Kavala, Greqi, kapja dhe arrestimi provizor i shtetasit Pëllumb Braçe, 63 vjeç, banues në Durrës.
Ky shtetas ishte shpallur në kërkim ndërkombëtar, pasi Gjykata e Rrethit Gjyqësor Durrës, e ka dënuar me 15 vjet burgim, për kryerjen e veprës penale “Mashtrimi”, me pasoja të rënda. Shtetasi Pëllumb Braçe, u ka marrë me anë të mashtrimit, shumën 72 mijë euro, 2 shtetasve, duke u premtuar shitjen e një dyqani në një pallat të ri, në Durrës.
– Po si rezultat i shkëmbimit të informacionit mes Interpol Tiranës dhe autoriteteve policore çeke, u bë lokalizimi në Çeki, kapja dhe arrestimi provizor i shtetasit Albert Lamaj, 38 vjeç, banues në Ballsh.
Ky shtetas ishte i shpallur në kërkim ndërkombëtar, pasi Gjykata e Rrethit Gjyqësor Sarandë, e ka dënuar me 2 vjet burgim, për kryerjen e veprës penale “Plagosja e rëndë me dashje”. Shtetasi Albert Lamaj, në datën 03.03.2017, në lagjen nr.3 Sarandë, pas një konflikti për motive të dobëta, ka plagosur rëndë, me mjet prerës (thikë), shtetasin M. Gj.
Interpol Tirana, në bashkëpunim me homologët grekë dhe ata çekë, vijon procedurat për ekstradimin e këtyre 2 shtetasve drejt Shqipërisë.
