Largimi i qarkut të Korçës nga harta e kultivimit të bimëve narkotike në vend ka qenë qëllimi i takimit të Task Forcës për parandalimin e kultivimit të lëndëve narkotike në të gjithë territorin e juglindjes.
Takimi u organizua nga prefekti Dhori Spirollari me pjesëmarrjen e përfaqësuesve nga Ministria e Brendshme, drejtuesve dhe punonjësve të policisë si dhe anëtarë të tjerë të këtij organizmi.
Zv/drejtorja e përgjithshme e policisë së shtetit Aida Hajnaj tha se për të bërë të mundur parandalimin e kultivimit të bimëve narkotike policia e shtetit do ta godasë këtë fenomen që në fazat e hershme duke ndaluar grupet të cilët futin farërat e kanabisit, si dhe do të identifikojë dhe asgjësojë asetet e autorëve.
Gjatë vitit të kaluar në qarkun e Korçës janë zbuluar 7 raste të kultivimit të bimëve narkotike me 15 autorë nga të cilët, 9 janë ndaluar. Drejtori i Drejtorisë Rajonale të Policisë qarku Korçë, Lorenc Panganika bëri të ditur se kanë qenë në total 8 parcela të kultivimit të bimëve narkotike me 1528 rrënjë.
Numri dy i policisë së shtetit Hajnaj tha se për të parandaluar kultivimin e bimëve narkotike është tepër i rëndësishëm sensibilizimi i popullatës ç’ka duhet të kryhet jo vetëm nga policia por edhe nga të gjitha institucionet.
Problem vijon të mbetet mungesa e informacionit për rastet e kultivimit të bimëve narkotike, kontrolli i territorit, moszbatimi korret i legjislacionit nga vetë institucionet, analiza e riskut si dhe mosvlerësimi dhe moskontrolli i tregut për farërat.
