Taksat nuk do të ndryshojnë, përkundrazi, qeveria synon lehtësimin e tyre për qytetarët dhe bizneset.
Edhe pse paketa fiskale pritet të publikohet javën e ardhshme, për shkak se po diskutohet ende me grupet e interesit dhe partnerët ndërkombëtarë, ministri i Financave Petrit Malaj siguroi se ajo nuk do të përmbajë asnjë masë që rëndon xhepat e shqiptarëve.
“Burimet kryesore të rritjes do të mbeten të lidhura me politikat e kujdesshme fiskale. Ministria e Financave ka miratuar gjithashtu paketën fiskale, e cila nuk parashikon taksa të reja apo rritje të tyre për vitin 2026”, tha Petrit Malaj.
Fokusi kryesor i projektbuxhetit për vitin e ardhshëm është mbrojtja sociale, me synimin për t’u garantuar të moshuarve një jetë më dinjitoze.
“Me shumë krenari mund të them se elementi më i veçantë është reforma e pensioneve. Pensioni urban do të arrijë në 40 mijë lekë, ndërsa pensioni rural në 18 mijë lekë. Kjo rritje, e parashikuar dhe e buxhetuar për tre vitet e ardhshme, do t’u japë brezave të parë më shumë dinjitet dhe mirëqenie”, u shpreh Malaj.
Në prezantimin e tij, ministri përmendi gjithashtu një sërë lehtësish fiskale, duke theksuar rikthimin e kompensimit për fermerët në masën 10% të faturës që dorëzojnë tek grumbulluesit, si dhe rivlerësimin e pronave me norma të favorshme.
“Një tjetër risi është skema e fermerëve, e cila synon të lehtësojë barrën e bujqve përmes mbështetjes direkte dhe kredive të buta. Norma e rivlerësimit do të jetë 5% dhe do të zbatohet gjatë gjithë vitit 2026”, deklaroi ministri i Financave.
Një tjetër fokus i veçantë i buxhetit është arsimi. Malaj theksoi se fondet për këtë sektor do të rriten ndjeshëm, duke mundësuar tekste shkollore falas dhe përmirësim të infrastrukturës arsimore./vizionplus.tv
