Kanë mbetur vetëm disa orë nga takimi që ka marrë vëmendjen e botës mes presidentit amerikan Donald Trump dhe homologut të tij rus Vladimir Putin. Takimi do të mbahet të hënën në Helsinki, i konfirmuar edhe nga Shtëpia e Bardhë një ditë më parë.
Biseda do të zhvillohet me dyer të mbyllura; vetëm Donald Trump dhe Valdimir Putin kokë më kokë, të shoqëruar me nga një përkthyes. As këshilltarët politikë dhe protokolluesit e kësaj bisede nuk do të jenë të pranishëm në sallë, edhe pse presidenti amerikan shkel kështu një rregull bazë të samiteve.
Një takim kokë me kokë me presidentin rus Putin, nga ana tjetër ka nxitur mosbesimin, pasi të dy presidentët e njohin veten si liderë mjaft të fuqishëm në një botë të mbushur me konflikte. Trump dhe Putin lënë të kuptohet se e admirojnë njëri tjetrin, pavarësisht kontradiktave në interesa.
Por çfarë pritet të dalë nga takimi i Helsinkit?
Presidenti amerikan i ka kushtuar një rëndësi të madhe jehonës mediatike që përcjell takimi. Ai vjen pas përplasjeve të vazhdueshme me Kremlinin për ndërhyrjen e dyshuar ruse në zgjedhjet presidenciale të 2016.
Mediat shkruajnë se qëllimet politike që Trump kërkon të arrijë janë ende të paqarta, ndryshe nga ato të presidentit Putin.
Shefi i Kremlinit i ka të qarta synimet: ai kërkon dorë të lirë në luftën civile në Siri, kontroll në Ukrainë, të cilën Putin e konsideron si zonë influence ruse, si dhe pranim nga Perëndimi i zotërimit të Krimesë, jo si agresion por si ribashkim me Rusinë.
Dhe në fund sanksionet e BE dhe SHBA kundër Moskës për shkak të Krimesë, Putin kërkon të marrin fund.
