Ish-deputetja e PD, Jorida Tabaku akuzoi kryeministrin Edi Rama dhe ministren Ogerta Manastirliu se gënjyen për investimet në shëndetësi dhe aksesin në shërbimin parësor.
Tabaku tha në “Facebook” se rritja e aksesit në shërbimin parësor është katër herë më pak seç raportojnë Rama dhe Manastirliu. Duke e krahasuar kreun e qeverisë me një virus të dëmshëm, Tabaku shtoi se më 25 prill shqiptarët do të shpëtojnë njëherë e mirë prej tij.
“Kur përpiqesh të gënjesh dhe i sajon numrat si t’i kërkon shefi! Me një grafik 3D me qëllim keqinformimin e publikut, qeveria dhe Rama po na tregon se Shqiptarët janë më mirë! Kështu për të mbuluar dështimin dhe mungesën e rezultateve konrekte, prodhojnë grafikë manipulues plot gabime aritmetike. Ky grafik i paraqitur sot nga zyra e propagandës në Kryeministri na tregon se rritja është 14%. Megjithëse edhe një nxënës në shkollën 9 vjeçare e kupton se me një zbritje dhe pjesëtim të thjeshtë rritja është thuajse 3%, pra 4 herë më pak se sa gënjeshtra Rama. Natyrisht, Rama vazhdon të gënjejë publikisht pa pasur nevojë të mbajë maskë pasi ka 8 vjet që i është futur shqiptarëve në trup si një virus i dëmshëm. Por, shqiptarët në 25 prill do të vaksinojnë një herë e mirë Shqipërinë për të shpëtuar nga Ramavirusi. Programi jonë i shëndetsisë ofron një shërbim që shkon tek qytetari!”
