Trajneri Silvinjo e konsideroi suksesin në Serbi fitore të të gjithë kombit, ndërsa ishte i rezervuar të fliste për të ardhmen e tij. Ndërsa te Serbia tensioni është i madh pas humbjes, pasi trajneri Stojkoviç dha dorëheqjen.
Suksesi i rëndësishëm në Serbi nuk ishte vendimtar vetëm për Shqipërinë, si mënyrë që të mbajë gjallë ëndrrën e kualifikimit në Botëror. Po aq i rëndësishëm ishte ky triumf edhe për Silvinjon, pankina e të cilit ka qenë e lëkundur gjatë këtyre muajve për shkak të paraqitjeve jo bindëse në kualifikuese. Sido të shkojnë bisedimet në fund të eliminatoreve në muajin nëntor, Silvinjo me suksesin në Serbi ka shkruar një tjetër histori të artë në krye të stolit kuqezi dhe braziliani nuk e fshehu krenarinë për këtë gjë.
“Është një ditë shumë e bukur, e paharrueshme. Kemi mundur një kundërshtar shumë të fortë, të vështirë, jemi në lojë, nuk është vendosur asgjë, është një hap i rëndësishëm. Unë u bëj komplimente të gjithëve. Mesazhi për shqiptarët është që jam krenar, është fitore e gjithë kombit, është një fitore e lojtarëve që ia kushtojmë vendit e ta gëzojnë 100%.”
Edhe lideri dhe kapiteni i skuadrës, mbrojtësi me shumë eksperiencë Berat Gjimshiti, u shpreh i lumtur për këtë sukses të madh.
Nëse Shqipëria dhe shqiptarët festojnë një triumf vërtet jetik për të ardhmen në grup, te Serbia situata është më e ndjerë se kurrë. Pas dorëheqjes së trajnerit Stojkoviç, janë larguar edhe të gjithë asistentët e tij dhe në krye për momentin është trajneri i kombëtares shpresa të Serbisë.
/vizionplus.tv
